Teny iditra Ilay vavy antitra!
Sokajin-teny anarana (lohatenin-tononkalo) [fitanisana]
Mpanoratra Rakotoson Emeralda
Lahatsoratra 
... dia hitako izy irery
manjohizohy moana,
iny amoron-kady iny
ka manara-kodimirana
hatreny am-parataza-maso,
mihovitrovitry ny hatsiaka
efa lozan-tany ery,
izato nofo efa trotraky
ny vanin’andro niainany.

Hontsa azy aho,
ka nantsoiko
tam-panahiko:

Ndeha ho aiza izato ianao
hoy aho, sombintsombiny,
no mirezareza valaka
sy manjokozoko mora
amin-damba latsaka ila
ety an-tsisin-dalana,
ka miraoka ireto bozaka
ny loholambanao
izay efa rota nitafiana sy
natsifaky ny ela?
Natsikiny ahy ny masony
ao anaty very maso
efa vizaky ny hanina
ka nabanjiny ahy mangina
sy miresaka any anatiny
ka mitafa am-panahy
ao anaty velovelony!

Tsapako avy hatrany
fa hamonjy taninandro
etsy ambody goavy maina
fara taza-masoandro
mba hitafy ankilahila
ito nofo izay miketrona
feno sarisarim-piainana!

Nakimpiko ny masoko
nivetso an’eritreritra
ka namisavisa irery
ity sari-Nanahary
tsy ho vita hoso-doko
eny an-tanan’ny mpahay
raha tany koa ny tany.
Voambolana 
Tsanganana sy sary iray takila Ny lohateny rehetra

Nohavaozina tamin' ny 2023/04/02