Teny iditra Rabearivelo: Dihy
Sokajin-teny   anarana (lohatenin-tononkalo)
Mpanoratra   Rabearivelo Jean-Joseph, 1931/09/16
  
Ritsodritso-baliha telo.
gobogobok' ampongatapaka,
lokanga dimy indray dinidy
sy sodin-taolana tsara loaka.

Io misonenika Ratovovavy,
miakanjo manga marain-droa !
Ny lamba valaka mavokely;
raozy gasy ao anaty volo.

Tsoakam-bero sa bararata
mihararetra any amoron' ala ?
Sidintsidin' ny andro meva,
sa angidi-mangan' ny eny an' ony?

Io misonenika Ratovovavy,
moana tahaka ny Fiadanana;
valiha telo, ampongatapaka,
lokanga, sodina no indray henony.

Fa injay ny molony mangovingovitra,
ipololoran'ny nofinofy;
tsy toha intsony ka zary kalo,
dia zary hira nony efa avy eo.
Mba hontsa koa Ravaviantitra,
ka io mirotsaka mba handihy,
mitari-joro ny ila sikiny,
dia toy ny androny mirefarefa.

Tsy kalokalo na hirahira
no mampifelana izato endriny,
ranomaso no mamonto azy,
mahatsiaro ny maty rehetra...

Mahatsiaro... Toa fenomanana
efa ho rendrika tsy ho hita.
inty mihintsana ny lohataona
ka zary fasana ravi-maina...

Dia mifanojo ny loha tondro,
ny tondro mihantsin-dRatovovavy
sy ny tondro efa fola-dRavaviantitra,
samy tanteraky ny hazavana.

Mifanojo ka toa tetezana
ifanohizan' ny alin-kely
efa foy ery an-tendrombohitra,
sy ny andro maneno akoho !
Voambolana  
Tsanganana sy sary iray takila   Ny lohateny rehetra

Nohavaozina tamin' ny 2017/06/20