Teny iditra Tonon-taona mampanembona
Sokajin-teny   anarana (lohatenin-tononkalo)
Mpanoratra   Razakandraina Jean Verdi Salomon (Dox)
  
Mihamandao, mihamisinda, ho dify izao ny fahavaratra...
Efa manga tolakandro ny lanitra tsindraindray,
Ary misy mahalankalana ny takariva soa tomaratra,
Ny alina tomefy kintana, ngaly, tony fehizay.

Efa isaina koa izany hanenoana kotro-baratra,
Tsy hita intsony ny eton-draratra mpambombambomba alahelo;
Ny sori-dalan'ny masoandro mihilana mianavaratra;
Efa mihamangoratsaka ny tara-bolana manelo

Tsy tsiaro loatra intsony ny evoky ny hafanana.
Akaiky dia ho vony vary, manatona ny fijinjana
Ka mihorakoraka eny ry zareo mpiandry fody.

Tonon-taona mampanembona ny ambanivohitry ny tena!
Mahatsiaro ery ny fo… ny an-kafa no jerena
Irery aty an-tanin'olona, manimanina te-hody.
Voambolana  
Tsanganana sy sary iray takila   Ny lohateny rehetra

Nohavaozina tamin' ny 2016/08/22